நாங்கள் ஒன்ராறியோ முதலீட்டு உரிமைகள் ஆணையம் (Ontario Securities Commission (OSC)

ஒன்ராறியோ முதலீட்டு உரிமைகள் ஆணையமானது (Ontario Securities Commission OSC), ஒன்ராறியோவில் மூலதனச் சந்தைகளை ஒழுங்குபடுத்துவதற்கான பொறுப்பு வகிக்கிறது.

முதலீட்டு உரிமைகள் சட்டம் (ஒன்ராறியோ) மற்றும் பண்டக எதிர்காலச் சட்டம் (ஒன்ராறியோ) ஆகியவற்றின் விதிப்பிரிவுகளுக்கு இணங்க OSC இதனை நிர்வகித்துச் செயற்படுத்துகின்றது. குறிப்பாக, முதலீட்டாளர்களைப் பாதுகாக்க நாங்கள் பணிபுரிகிறோம், நியாயமான மற்றும் திறமையான சந்தைகளை ஊக்குவிக்கிறோம், மேலும் ஒன்ராறியோவில் முதலீட்டு உரிமைகள் துறையைக் கட்டுப்படுத்தும் விதிகளை உருவாக்குவதன் மூலமும் அவை பின்பற்றப்படுவதைக் கண்காணிப்பதன் மூலமும் பொருளாதாரக் கொள்கையின் உறுதித்தன்மைக்குப் பங்களிப்புச் செய்கிறோம்.

முதலீட்டாளர் அலுவலகம் (www.InvestorOffice.ca) என்பது OSC-யின் ஒழுங்குமுறை நடவடிக்கைகள் கிளை ஆகும். முதலீட்டாளர் அலுவலகம், மூலோபாய வழிகாட்டுதல்களை நிர்ணயிக்கிறது மற்றும் முதலீட்டாளர் ஈடுபாடு, கல்வி, தொடர்பேற்படுத்தல் மற்றும் ஆராய்ச்சியில் OSC இன் முயற்சிகளை முன்னெடுத்துச் செல்கிறது.

இந்த அலுவலகம் ஒரு கொள்கைச் செயற்பாட்டைக் கொண்டிருப்பதுடன், வங்கிச் சேவைகள் மற்றும் முதலீடுகள் தீர்ப்பாயத்தினை (Ombudsman for Banking Services and Investments (OBSI) மேற்பார்வையிடுவதில் ஒரு முக்கிய பங்கும் வகிக்கிறது, மேலும் OSC-யின் நடத்தை சார்ந்த உள்நோக்குகளிலும் முதலீட்டாளர் அனுபவத்தை மேம்படுத்துவதிலும் தலைமைத்துவத்தை வழங்குகிறது.

விசாரணைகள் மற்றும் தொடர்பு மையம்

ஒரு நிறுவனத்தைப் பற்றியோ, ஒரு முதலீட்டுத் திட்டம் அல்லது உங்கள் நிதிப் பிரதிநிதியின் நடத்தை பற்றியோ உங்களுக்கு ஏதாவது கேள்வி அல்லது புகார் இருந்தால், ஒன்ராறியோ முதலீட்டு உரிமைகள் ஆணையத்தின் (Ontario Securities Commission) விசாரணைகள் மற்றும் தொடர்பு மையத்தை நீங்கள் தொடர்புகொள்ளலாம்.

இந்தக் குழு 200 க்கும் மேற்பட்ட மொழிகளில் உங்கள் கேள்விகளுக்குப் பதிலளிக்க முடியும்.

விசாரணைகள் மற்றும் தொடர்பு மையம் உங்கள் கேள்விகளுக்கு பதிலளிப்பதுடன் உங்கள் புகார் அல்லது விசாரணையை ஒன்ராறியோ முதலீட்டு உரிமைகள் ஆணையத்தில் உள்ள வேறொரு கிளைக்குப் பரிந்துரைக்கவும் செய்யலாம்.

நாங்கள் உதவ முடியும்

நீங்கள் முதலீடு செய்வதற்கு முன் சோதித்தறியவும்

முதலீட்டு மோசடியைத் தவிர்க்க உதவுவதற்கான மிகச் சிறந்த வழிகளில் ஒன்று என்னவெனில், உங்களுக்கு முதலீட்டு வாய்ப்பை அல்லது முதலீட்டு ஆலோசனையை வழங்கும் ஒரு நபர் அவ்வாறு செய்வதற்குப் பதிவு செய்துள்ளாரா என உறுதிப்படுத்துவதாகும்.

பொதுவாக, முதலீட்டுப் பத்திரங்களை விற்பனை செய்கின்ற அல்லது முதலீட்டு ஆலோசனை வழங்குகின்ற ஒருவர் அவர்கள் சேவைகளை வழங்குகின்ற மாகாணங்களில் அல்லது பிராந்தியங்களில் செயற்படும் முதலீட்டு உரிமைகள் ஒழுங்காற்றுனரிடம் பதிவு செய்திருக்க வேண்டும்.

முதலீட்டு உரிமைகள் ஆணையம் (Ontario Securities Commission) போன்ற முதலீட்டுக் கட்டுப்பாட்டாளர்கள், பொதுமக்களுக்கு முதலீடுகளை விற்பனை செய்வதற்கு அல்லது ஆலோசனை வழங்குவதற்கு உரிய தகுதி பெற்றுள்ள மக்கள் அல்லது நிறுவனங்களை மட்டுமே பதிவு செய்வார்கள் என்பதால், இந்தப் பதிவு முதலீட்டாளர்களைப் பாதுகாக்க உதவுகிறது.

நீங்கள் கையாளும் ஒரு நபர் அல்லது நிறுவனம் பதிவு செய்யப்படவில்லை என்பதை நீங்கள் கண்டறிந்தால், அல்லது உரிய அனுமதி பெற்றிராத ஒரு சேவையை வழங்குவதை நீங்கள் அறிந்தால், உங்களுடைய உள்ளூர் முதலீட்டு உரிமைகள் ஒழுங்காற்றுனரைத் தொடர்புகொள்ளவும். ஒன்ராறியோவில், ஒன்ராறியோ முதலீட்டு உரிமைகள் ஆணையத்தை (Ontario Securities Commission) நீங்கள் தொடர்புகொள்ளலாம்.

பதிவு செய்யப்படுவதற்கு அவசியமானது என்ன?

தேர்ச்சி

பதிவு செய்வதற்குத் தனிநபர்கள் குறிப்பிட்ட கல்வி மற்றும் அனுபவத் தேவைகளைப் பூர்த்தி செய்திருக்க வேண்டும். இத் தேவைகள் ஒரு நபர் எந்த வகையான பதிவுக்காக விண்ணப்பிக்கிறார் என்பதைச் சார்ந்துள்ளது. ஒவ்வொரு வகையிலும் வெவ்வேறு தேவைகள் உள்ளன மற்றும் அவை வெவ்வேறு செயற்பாடுகளை அனுமதிக்கின்றன.

நாணயம்

நிறுவனங்களும் தனிநபர்களும், குறிப்பாக வாடிக்கையாளர்களைக் கையாளும்போது நாணயத்துடன் நடந்துகொள்ள வேண்டும், இது நேர்மை மற்றும் நன்னம்பிக்கையை உள்ளடக்குகிறது. தனிநபர்கள், அவர்கள் பின்னணி மற்றும் காவற்துறைப் பரிசோதனைகளுக்கு உட்படுத்தப்படுகிறார்கள் அத்துடன் நிறுவனங்களும் அனைத்து பதிவுசெய்த தனிநபர்களும் ஒவ்வொரு ஆண்டும் தங்கள் பதிவைப் புதுப்பித்துக் கொள்ளவேண்டும்.

கடன்களைத் தீர்க்கும் திறன்

நிறுவனங்கள் தங்களுடைய அன்றாட கடமைப்பொறுப்புகளை மேற்கொள்வதற்குத் தேவைப்படுகின்ற முதலீட்டு மற்றும் காப்புறுதி நிபந்தனைகளைப் பூர்த்தி செய்வதன் மூலம் தங்களது கடன் தீர்க்கும் திறனைத் தக்கவைத்துக் கொள்ள வேண்டும்.

பதிவைச் சரிபார்ப்பது விரைவானது மற்றும் எளிதானது. பதிவு நிலையைச் சரிபார்க்கவும் முதலீட்டுத் துறையில் உள்ள ஒரு நபரின் அல்லது வணிகத்தின் ஒழுக்க வரலாற்றை மதிப்பாய்வு செய்வதற்கும் National Registration Search கருவியைப் பயன்படுத்தவும்.

ஒரு வணிகத்தின் அல்லது தனிநபரின் பதிவை இப்பொழுதே சரிபார்க்கவும்

பதிவுடைமை மட்டுமே நீங்கள் பணம் சம்பாதிப்பீர்கள் அல்லது பணத்தை இழக்கமாட்டீர்கள் என்பதற்கு உத்தரவாதம் அளிக்காது

கனடாவில் உங்கள் எதிர்காலத்துக்காக முதலீடு செய்தல்

ஒரு வீடு வாங்குதல், உங்கள் குழந்தைகளின் கல்விக்காக சேமித்தல் அல்லது உங்கள் ஓய்வுகாலத்துக்காக சேமித்தல் போன்ற உங்கள் எதிர்காலத் தேவைகளுக்காக உங்கள் பணத்தைச் சேமித்து வைக்கப் பல முதலீட்டுத் தெரிவுகள் உள்ளன.

முதலீடுகள் பொதுவாக மூன்று முக்கிய சொத்து வகைகளின் கீழ் வருகின்றன

பணம்

பண முதலீடுகள் என்பது சேமிப்புக் கணக்குகள், உத்தரவாதமுடைய முதலீட்டுப் பத்திரங்கள் (guaranteed investment certificates (GICs) போன்ற நிலையான கால வைப்புகள், நாணயங்கள், பணச் சந்தை நிதிகள் மற்றும் ஒரு ஆண்டுக்குள் முதிர்ச்சி அடையும் அரசாங்க மற்றும் நிறுவன நிதி ஒப்பந்தப் பத்திரங்கள் ஆகியவற்றை உள்ளடக்குகின்றன.

நிலையான வருமானம்

நிலையான வருமான முதலீடுகள் என்பவை ஒரு ஆண்டுக்கு மேற்பட்ட முதிர்வுக் காலத்தைக் கொண்ட அரசாங்க மற்றும் கூட்டுத்தாபன நிதி ஒப்பந்தப் பத்திரங்கள், முன்னுரிமைப் பங்குகள் மற்றும் பிற கடன் பத்திரங்கள் ஆகியவற்றை உள்ளடக்குகின்றன.

தேறுமதிகள்

தேறுமதி முதலீடுகள் என்பவை பொதுவான பங்குகள், சில வழி வந்த பொருட்கள் (உரிமைகள், உத்தரவாதங்கள், விருப்பத்தெரிவுகள்), மாற்றத்தக்க நிதி ஒப்பந்தப் பத்திரங்கள் மற்றும் மாற்றத்தக்க முன்னுரிமைப் பங்குகள் ஆகியவற்றை உள்ளடக்குகின்றன.

உங்கள் முதலீடுகளை ஒரு பதிவு செய்யப்பட்ட அல்லது பதிவு செய்யப்படாத கணக்கில் நீங்கள் வைத்திருக்க முடியும். ஒவ்வொரு வகைக் கணக்கும் அதற்கே உரித்தான சில சிறப்பம்சங்கள், தகுதி நிபந்தனைகள் மற்றும் கட்டுப்பாடுகளைக் கொண்டிருக்கிறது. உங்களுக்கும் உங்கள் குடும்பத்துக்கும் எந்தக் கணக்கு (அல்லது கணக்குகள்) சிறப்பாகப் பொருந்தும் என்பதைப் பற்றி ஆராய்வது முக்கியமானது.

கனடாவில் கிடைக்கும் முதலீட்டுக் கணக்குகளின் வகைகள் மற்றும் முதலீட்டுத் தெரிவுகள் பற்றிய மேலதிக விபரங்களுக்கு, GetSmarterAboutMoney.ca-ஐப் பார்க்கவும்.

திட்டமிடல் மற்றும் நிர்வகித்தல்

நீங்கள் ஒரு நிதித் திட்டமிடலைத் தொடங்கும்போது பணம் சேமித்தல், வரவுசெலவுத் திட்டமிடுதல் மற்றும் கடன் நிர்வாகம் ஆகியவை முக்கியமான நடைமுறைகளாக உள்ளன.

பொதுவாக மக்கள் விரைவில் செலவழிக்கத் திட்டமிட்டுள்ள பணத்தைப் போட்டு வைக்க சேமிப்பு மற்றும் காசோலைக் கணக்குகளைப் பயன்படுத்துகிறார்கள். அனேகமாக எவரும் ஒரு வங்கிக் கணக்கை ஆரம்பிக்கலாம். நீங்கள் வேலையில் இருக்க வேண்டும் என்ற அவசியமில்லை அல்லது குறைந்தபட்சத் தொகை வைத்திருக்க வேண்டியதில்லை.

நீங்கள் 18 வயதுக்குட்பட்டவராக இருந்தால், பெற்றோர் அல்லது பாதுகாவலர் உதவியுடன் நீங்கள் வங்கிக் கணக்குத் தொடங்க முடியும். ஒரு வங்கிக் கணக்குத் தொடங்குவதற்கு 2 ஏற்றுக்கொள்ளத்தக்க அடையாளச் சான்றுகளை நீங்கள் வைத்திருக்க வேண்டும்.

கணக்குகளின் வகைகள்

காசோலைக் கணக்கு

அன்றாடச் செலவுகளுக்காக அல்லது கட்டணங்கள் செலுத்துவதற்காகப் பயன்படுத்தப்படும் ஒரு கணக்கு.

சேமிப்புக் கணக்கு

குறுகிய-காலச் செலவுகளுக்காக அல்லது அவசரத் தேவைகளுக்குக் கைவசம் பணம் வைத்திருப்பதற்காகச் சேமிப்பதற்கு, சேமிப்புக் கணக்குகள் மிகவும் உகந்தவையாகும். இந்தக் கணக்குகளிலிருந்து நீங்கள் பணத்தை விரைவாக எடுக்கலாம், மேலும் அவை வழக்கமாகக் காசோலைக் கணக்கில் நீங்கள் பெறுவதை விட சற்று அதிக வட்டி வழங்குகின்றன.

முதலீட்டுக் கணக்கு

உங்கள் பணத்தைச் சேமிப்பதற்கும் வளர்க்கவும் உங்களுக்கு உதவ – முதலீட்டு நோக்கங்களுக்காக பயன்படுத்தப்படும் ஒரு கணக்கு.

பெரும்பாலான நிதி நிறுவனங்கள் பல்வேறு வகையான கணக்குகளை வழங்குகின்றன.

வங்கிகள் மற்றும் அறக்கட்டளை நிறுவனங்கள்

ஒரு துளைவாயிலாக வெளியே வருகின்ற நாணயத்தாள்

கடன் சங்கங்கள்

முதலீட்டு நிறுவனங்கள்

நிதி நிறுவனம் நொடித்துவிடும் பட்சத்தில், ஏற்படும் இழப்புகளுக்கு உங்கள் காசோலை மற்றும் சேமிப்புக் கணக்குகளில் இடப்பட்டுள்ள வைப்புத்தொகைகளுக்கு கனடாவின் வைப்புத்தொகைக் காப்புறுதி நிறுவனம் (Canada Deposit Insurance Corporation (CDIC) வாயிலாக அல்லது ஒரு மாகாண வைப்புத்தொகைக் காப்புறுதி நிறுவனம் வாயிலாக நிர்ணயிக்கப்பட்ட வரம்புகள் வரைக்கும் பாதுகாப்பு அளிக்கப்பட்டுள்ளது. உங்கள் நிதி நிறுவனம் கனடா முதலீட்டுத் துறை ஒழுங்காற்று நிறுவனத்தின் (Investment Industry Regulatory Organization of Canada (IIROC) ஒரு உறுப்பினராக இருந்தால், உங்கள் முதலீட்டுக் கணக்குக்கு கனடாவின் முதலீட்டாளர் பாதுகாப்பு நிதியம் (Canadian Investor Protection Fund (CIPF) வாயிலாக இதேபோன்ற பாதுகாப்பும் பொதுவாக கிடைக்கிறது. ஆயினும், இந்த வைப்புத்தொகைகளுக்குத் தனிப்பட்ட, வணிக அல்லது முதலீட்டு இழப்புகளிலிருந்து பாதுகாப்பு வழங்கப்படுவதில்லை.

சேமிப்புத் திட்டங்கள்

உங்கள் எதிர்கால இலக்குகளுக்காக சேமிக்க அல்லது முதலீடு செய்ய உங்களுக்கு உதவுவதற்கு, கனடா அரசாங்கம் வரிச் சலுகைகளைக் கொண்ட பல சேமிப்பு மற்றும் முதலீட்டுத் திட்டங்களை உருவாக்கியுள்ளது.

RRSPs

பதிவு பெற்ற பணி ஓய்வுகால சேமிப்புத் திட்டமானது (Registered Retirement Savings Plan (RRSP) பணி ஓய்வு காலத்துக்காக பணம் சேமிக்க உங்களுக்கு உதவுவதை நோக்கமாகக் கொண்டிருக்கிறது. RRSP பங்களிப்புகள் வரிக்கு- முந்தைய வருவாய்களைக் கொண்டு மேற்கொள்ளப்படுகின்றன, அதாவது பங்களிப்புகளுக்காகப் பயன்படுத்தப்படும் வருமானத்துக்கு நீங்கள் வரி செலுத்த வேண்டியதில்லை, ஆனால் அவற்றிலிருந்து மீள எடுக்கும் பணத்துக்கு நீங்கள் வரி செலுத்த வேண்டும். ஒரு RRSP-க்கு உங்களால் வழங்க முடியும் பங்களிப்புத் தொகையானது, குறிப்பிட்ட வரம்புகள் வரை நீங்கள் ஈட்டும் வருமானத்தை அடிப்படையாகக் கொண்டிருக்கிறது.

ஒரு RRSP தொடங்குவதற்கான 5 காரணங்கள்

பங்களிப்புகள் வரிக் கழிவுக்கு உட்பட்டவை

உங்கள் பங்களிப்பை வருமான வரி தாக்கல் செய்யும்போது கழிப்புத்தொகையாக நீங்கள் காண்பிக்க முடியும். உதாரணமாக, ஒன்ராறியோவில் நீங்கள் அதிக வரிப் பிரிவுக்குள் வருபவராக இருந்தால், நீங்கள் பங்களிக்கும் ஒவ்வொரு $1,000மும் நீங்கள் செலுத்தும் வரியை சுமார் $535 வரைக் குறைக்கிறது.

சேமிப்புகள் வரியில்லாமல் வளர்கின்றன

முதலீட்டு வருமானங்கள் உங்கள் RRSP-யில் இருக்கும் வரை நீங்கள் அவற்றுக்கு எந்த வரியும் செலுத்த வேண்டியதில்லை. இந்த வரி-அற்ற தொகையாக்கம் உங்கள் சேமிப்பு விரைந்து வளர உதவுகிறது.

நீங்கள் பணி ஓய்வு பெறும்போது வழக்கமான கொடுப்பனவுகளைப் பெறும் வகையில் உங்கள் RRSP-ஐ நீங்கள் மாற்றிக்கொள்ள முடியும்

நீங்கள் பணி ஓய்வு பெறும்போது உங்கள் RRSP சேமிப்புகளை வரியில்லாமல் ஒரு RRIF ஆக அல்லது ஆண்டுத்தொகையாக நீங்கள் மாற்றிக்கொள்ள முடியும். ஒவ்வொரு ஆண்டும் நீங்கள் பெறும் வழக்கமான கொடுப்பனவுகள் மீது நீங்கள் வரி செலுத்துவீர்கள் – ஆனால் பணிஓய்வுக் காலத்தில் நீங்கள் குறைந்த வரிப் பிரிவுக்குள் இருந்தால் பணிபுரியும் காலத்துடன் ஒப்பிடும்போது நீங்கள் குறைவான வரியே செலுத்துவீர்கள். தேவையான மாற்றும் திகதி உங்களுக்கு 71 வயது ஆகும் வருடத்தின் டிசம்பர் 31 ஆகும்.

வாழ்க்கைத் துணைவருக்கான RRSP திட்டம் உங்கள் ஒருங்கிணைந்த வரிச் சுமையைக் குறைக்க முடியும்

நீங்கள் உங்கள் வாழ்க்கைத் துணைவரை விட அதிகம் சம்பாதிப்பவராக இருந்தால், வாழ்க்கைத் துணைவருக்கான RRSP-க்குப் பங்களிப்பதன் மூலம் அவர்கள் வரியற்ற சேமிப்பை உருவாக்க நீங்கள் உதவ முடியும். பின்னர் ஓய்வுகால வருமானம் உங்கள் இருவருக்கும் இடையே சமமாகப் பகிரப்படும் – இதனால் நீங்கள் செலுத்தும் மொத்த வரித்தொகை குறையலாம்.

முதலாவது வீடு வாங்குவதற்கு அல்லது உங்கள் கல்விக்காக உங்கள் RRSP -யிலிருந்து நீங்கள் கடன் வாங்க முடியும்

உங்கள் முதலாவது வீட்டுக்கு முற்பணம் கொடுப்பதற்காக $25,000 வரையிலும், உங்களுக்கான அல்லது உங்கள் வாழ்க்கைத் துணைவருக்கான கல்விச் செலவுகளுக்காக $20,000 வரையிலும் நீங்கள் எடுக்க முடியும். குறிப்பிட்ட கால வரையறைக்குள் பணத்தை நீங்கள் திருப்பிச் செலுத்தும் வரை இவ்வாறு எடுத்த பணத்துக்கு நீங்கள் வரி எதுவும் செலுத்த வேண்டியதில்லை.

RRSP சேமிப்புக் கணிப்பான்

பணிஓய்வுக் காலத்தில் உங்கள் RRSP எந்த அளவுக்குப் பெறுமதியுள்ளதாக இருக்கும் என்பதைக் கண்டறிய இந்த RRSP சேமிப்புக் கணிப்பானைப் பயன்படுத்தவும்.

கணிப்பானைப் பயன்படுத்தவும்

RESPs

பதிவு செய்யப்பட்ட கல்விச் சேமிப்புத் திட்டம் (Registered Education Savings Plan (RESP) என்பது உயர்நிலைப் பாடசாலைக்குப் பிறகு உங்கள் குழந்தையின் கல்விக்காகச் சேமிக்க உங்களுக்கு உதவக்கூடிய ஒரு அர்ப்பணிப்பு மிக்க சேமிப்புத் திட்டம் ஆகும். ஒரு குழந்தைக்கு நீங்கள் RESP பெற்றிருந்தால், உங்கள் குழந்தையின் கல்விக்காகச் சேமிக்க உங்களுக்கு உதவுவதற்கு ஒரு குறிப்பிட்ட வரம்பு வரை கல்வி உதவித்தொகைகள் வழங்குவதன் மூலம் கனடா அரசாங்கம் கூடுதல் சேமிப்பு சலுகைகளை வழங்கும். நீங்கள் பெறும் தொகை உங்களுடைய வருடாந்தப் பங்களிப்புகள் மற்றும் குடும்ப வருமானம் ஆகியவற்றைச் சார்ந்திருக்கிறது.

RESP இன் 3 வகையான திட்டங்களாவன:

தனிநபர்

தனிநபர் திட்டம் என்பது ஒரு பயனாளியின் கல்விக்குப் பணம் செலுத்துவதை நோக்கமாகக் கொண்டதாகும். யார் வேண்டுமானாலும் ஒரு தனிநபர் திட்டத்தைத் தொடங்கலாம், மற்றும் யார் வேண்டுமானாலும் அதற்குப் பங்களிப்பு வழங்கலாம். உங்களுக்காகக் கூட நீங்கள் ஒரு திட்டத்தைத் தொடங்கலாம். நீங்கள் வழக்கமாக குறைந்தபட்ச வைப்புத்தொகை செலுத்த வேண்டியதில்லை. உயர்நிலைப் பாடசாலைக்குப் பின்னர் பயனாளி தனது கல்வியைத் தொடரவில்லை எனில், வேறொரு பயனாளியை நீங்கள் குறிப்பிட முடியும்.

பங்களிப்புகள்:

எப்போது, எவ்வளவு பணம் இடுவது என்பதை நீங்கள் தீர்மானிக்கிறீர்கள். ஒரு பயனாளிக்கான ஆயுட்காலப் பங்களிப்பு வரையறை $50,000 ஆகும்.

குடும்பம்

ஒரு குடும்பத் திட்டத்தில் ஒன்றுக்கு மேற்பட்ட பயனாளிகள் இருக்கலாம். ஆனால் ஒவ்வொரு பயனாளியும் திட்டத்தைத் தொடங்குபவருடன் உறவுமுறை கொண்டிருக்க வேண்டும் (உதாரணமாக, உங்கள் குழந்தைகள், பேரக் குழந்தைகள், சகோதரர்கள் மற்றும் சகோதரிகள்), மற்றும் நீங்கள் அவர்களைச் குறிப்பிடும்போது அவர்கள் 21 வயதுக்கு உட்பட்டவர்களாக இருக்க வேண்டும்.

பங்களிப்புகள்:

திட்டத்தைத் தொடங்கும்போது வழக்கமாக நீங்கள் குறைந்தபட்ச வைப்புத்தொகை எதையும் செலுத்த வேண்டியதில்லை மற்றும் எப்போது, எவ்வளவு பணம் இடுவது என்பதை நீங்கள் தீர்மானிக்கிறீர்கள். ஒவ்வொரு பயனாளிக்கான ஆயுட்காலப் பங்களிப்பு வரையறை $50,000 ஆகும்.

குழு

குழுத் திட்டங்கள் தனிநபர் மற்றும் குடும்பத் திட்டங்களிலிருந்து வேறுபட்டவை ஆகும். ஒவ்வொரு திட்டமும் அதற்குரிய பிரத்தியேக விதிகளைக் கொண்டிருக்கிறது. மேலும் அவை அதிக கட்டணங்களையும் அதிகமான கட்டுப்பாட்டு விதிகளையும் கொண்டிருக்கின்றன. குழந்தை உங்களுடன் உறவுமுறை கொண்டிருக்க வேண்டியதில்லை மற்றும் நீங்கள் ஒரு திட்டத்தைத் தொடங்கும்போது நீங்கள் குறைந்தபட்ச வைப்புத்தொகை செலுத்த வேண்டும்.

பங்களிப்புகள்:

ஒரு நிர்ணயிக்கப்பட்ட அட்டவணைக்கு இணங்க, ஒரு பயனாளிக்கு ஆயுட்காலப் பங்களிப்பு வரையறை $50,000 வரை RESP-யில் நீங்கள் பணம் செலுத்த முடியும்.

நீங்கள் இடும் பணம் மற்ற முதலீட்டாளர்களின் பங்களிப்புகளுடன் ஒன்றாக இணைக்கப்படுகிறது.

முதலீட்டு முடிவுகள் அனைத்தும் உங்களுக்காக எடுக்கப்படுகின்றன.

உங்களுக்குத் தெரியுமா?

எந்தவொரு அபராதமும் இன்றி உதவித்தொகைத் திட்ட விநியோகஸ்தர்கள் வழங்கிய திட்டங்களை இரத்து செய்ய ஒப்பந்தத்தில் கையெழுத்திட்ட பின் உங்களுக்கு 60 நாட்கள் கால அவகாசம் உள்ளது.

TFSAs

வரி-அற்ற சேமிப்புத் திட்டம் Tax-Free Savings Account (TFSA) என்பது நீங்கள் விரும்பும் எந்த இலக்குக்கும் உங்கள் சேமிப்பு, வரியின்றி வளர உதவக்கூடிய ஒரு சேமிப்புக் கணக்கு ஆகும்.

ஒரு TFSA தொடங்குவதற்கான 4 காரணங்கள்

நீங்கள் ஏற்கனவே உங்கள் RRSP -க்கு ஒவ்வொரு ஆண்டும் முழுத் தொகை பங்களிப்பு செலுத்தி வருகிறீர்கள்

நீங்கள் பணி ஓய்வு பெறும்போது, உங்கள் TFSA இலிருந்து வரியின்றி நீங்கள் வருமானம் பெற முடியும். இது உங்கள் RRSP யிலிருந்து பணம் எடுப்பதையும் – அவ்வாறு எடுக்கப்படும் பணத்துக்கு வரி செலுத்துவதையும் தாமதப்படுத்த உங்களுக்கு உதவக்கூடும்.

கையிருப்பிலுள்ள பணத்தை வைத்திருக்கும் பை

TFSA -லிருந்து நீங்கள் பணம் எடுக்கும்போது உங்கள் வருமான வரி விகிதம் அதிகமாக இருக்கும் என எதிர்பார்க்க முடியும்

ஒரு TFSA யில் நீங்கள் செலுத்தும் பணத்துக்கு ஏற்கனவே வரி விதிக்கப்பட்டுள்ளது. எனவே நீங்கள் பணம் எடுக்கும்போது உங்கள் வரி விகித வரம்பு அதிகமாக இருந்தால், நீங்கள் குறைந்த வரி செலுத்தினால் போதும். ஒரு RRSP யில் சேமிப்பது இதற்கு எதிர்மாறு என்பது உண்மையே. உங்கள் RRSP சேமிப்புகளிலிருந்து நீங்கள் பணம் எடுக்கும்போது எதிர்காலத்தில் விதிக்கப்படும் அதிக வரி விகிதம் உங்கள் வரிக் கட்டணத்தையும் அதிகரித்துவிடும்.

உங்களுக்கு ஒரு நெகிழ்வான சேமிப்புத் திட்டம் தேவை

உங்கள் TFSA யில் உள்ள பயன்படுத்தப்படாத எந்தப் பங்களிப்புகளையும் வருங்கால ஆண்டுகளுக்கு நீங்கள் எடுத்துச் செல்ல முடியும். மேலும், உங்கள் TFSA சேமிப்புகளிலிருந்து நீங்கள் பணம் எடுத்தால், பின்னொரு திகதியில் எடுத்த பணம் முழுவதையும் நீங்கள் திருப்பிச் செலுத்த முடிவதுடன் ஒவ்வொரு ஆண்டும் அதிகபட்ச தொகை வரை சேமிக்க முடியும்.

நீங்கள் உங்கள் முதலீடுகள் மீதான வரியைக் குறைக்க விரும்புகிறீர்கள்

இதர வழிகளில் அதிக வரிவிதிப்புக்கு உட்படுத்தப்படும் முதலீடுகளுக்கான ஒரு பாதுகாப்பிடமாக TFSA ஐ நீங்கள் பயன்படுத்த முடியும். ஏனெனில், உங்கள் TFSA ஈட்டும் வருமானம் மீது நீங்கள் வரி செலுத்த வேண்டியதில்லை. உதாரணங்கள்: வட்டி வருமானம் அல்லது வெளிநாட்டுப் பங்கு இலாபங்கள்.

உங்கள் வரித் திட்டமிடலின் பயனுள்ள ஒரு பகுதியாக TFSA ஒன்றினை எப்படிப் பயன்படுத்த முடியும் என்பது குறித்த சில நிபுணத்துவ ஆலோசனைகளைப் பெற நீங்கள் விரும்பலாம்.

TFSA மற்றும் RRSP ஐ ஒப்பிடுதல்

TFSA கள் மற்றும் RRSP கள் இரண்டுமே உங்கள் சேமிப்பு இலக்குகளை அடைய உதவக்கூடிய வரி அனுகூலங்களை வழங்குகின்றன. நீங்கள் அவற்றை வாங்கக் கூடுமானால், இரண்டுக்கும் உங்களால் இயன்றளவுக்குப் பங்களிப்பதே ஒரு சிறந்த உத்தியாக இருக்கும்.

ஆனால் நீங்கள் ஒன்றை விட மற்றொன்றைத் தேர்ந்தெடுக்க வேண்டியிருந்தால், அவை எவ்வாறு வேறுபடுகின்றன என்பதை நீங்கள் புரிந்துகொண்டுள்ளீர்கள் என்பதை உறுதி செய்துகொள்ளுங்கள். மேலும், உங்களுடைய தனிப்பட்ட நிதி மற்றும் வரிச் சூழ்நிலைகளின் அடிப்படையில் உங்கள் தெரிவை மேற்கொள்ளுங்கள்.

TFSAகள் மற்றும் RRSPகளுக்கு இடையிலான 6 முக்கிய வேறுபாடுகள்

ஒரு RRSP பணி ஓய்வுகால சேமிப்பை நோக்கமாகக் கொண்டதாகும். ஒரு TFSA எல்லா விதமான சேமிப்பு இலக்குகளுக்கும் பொருந்தக்கூடியதாகும்.

RRSP பங்களிப்புகள் வரிவிலக்குக்கு தகுதியுடையவை. TFSA பங்களிப்புகள் வரிவிலக்குக்கு தகுதியுடையவை அல்ல. ஒரு RRSP மூலம், உங்கள் வரித் தாக்கலின் போது நீங்கள் தெரிவிக்கும் வருமானத்திலிருந்து உங்கள் பங்களிப்பை கழித்துக்கொள்ளலாம். ஒரு TFSA மூலம், உங்கள் வரித் தாக்கலின் போது உங்கள் பங்களிப்பை நீங்கள் கழித்துக்கொள்ள முடியாது.

RRSP பணமெடுத்தல்கள் மீது நீங்கள் வரி செலுத்த வேண்டும், ஏனெனில் நீங்கள் வரிக்கு முன்னரான வருமானம் மீது பங்களிப்புச் செலுத்தியிருக்கிறீர்கள். TFSA பணமெடுத்தல்கள் வரிவிலக்கு பெற்றுள்ளன, ஏனெனில் இதில் வரிக்குப் பின்னரான வருமானத்திலிருந்து நீங்கள் பங்களிப்புச் செலுத்தியிருக்கிறீர்கள்.

ஒரு RRSP-க்குப் பங்களிக்க உங்களுக்கு சம்பாதித்த வருமானம் தேவை, ஆனால் ஒரு TFSA க்கு அது தேவையில்லை.

உங்களுக்கு 71 வயது ஆகும் வருடத்தின் பின் நீங்கள் உங்கள் RRSP-யில் பங்களிப்புச் செலுத்த முடியாது, அதை நீங்கள் முடித்துவிட வேண்டும். அந்த நேரத்தில், ஒரு RRIF அல்லது ஒரு ஆண்டுத்தொகை வாங்குவதற்கு நீங்கள் உங்கள் சேமிப்புகளைப் பயன்படுத்த வேண்டும். ஒரு TFSA -ஐப் பொறுத்த வரை, பங்களிப்பை நீங்கள் நிறுத்தவோஅல்லது ஒரு குறிப்பிட்ட வயதுக்குப் பின் அதை முடித்து விடவோ வேண்டியதில்லை.

இரண்டு திட்டங்களிலுமே, உங்கள் வாழ்க்கைத் துணைவரை ஒரு பயனாளியாக நீங்கள் சேர்த்துக்கொள்ள முடியும். உங்கள் இறப்புக்குப் பின்னர் பணம் அவர்களுக்குக் கிடைக்கும். ஆனால் RRSP -யில், உங்கள் வாழ்க்கைத் துணைவர் இறந்த பிறகு, கணக்கில் உள்ள பணத்துக்கு வரி செலுத்தப்பட வேண்டும். எனவே பணம் உங்கள் குழந்தைகளுக்குப் பரம்பரைப் பாத்தியமுள்ளதாக இருந்தாலும், வரி செலுத்திய பின்னர் மீதமுள்ள தொகையை மட்டுமே அவர்கள் பெறுவார்கள். ஒரு TFSA -யில், இறந்த திகதியில் TFSA சேமிப்பில் இருந்ததை விட அதிகரித்துள்ள பெறுமதித் தொகைக்கு மட்டுமே குழந்தைகள் அவற்றைப் பெறும் ஆண்டில் வரி விதிக்கப்படுகிறது. அவர்கள் பெறும் தொகை இறப்பின் போது இருந்த TFSA –இன் பெறுமதித் தொகையை விட அதிகரிக்கவில்லை எனில், வரி எதுவும் செலுத்த வேண்டியதில்லை.

RRIFs

பதிவுபெற்ற பணி ஓய்வுகால வருமான நிதியம் (Registered Retirement Income Fund (RRIF) என்பது உங்கள் ஓய்வுகாலச் சேமிப்புகளைத் தக்கவைத்து நீங்கள் பணி ஓய்வு பெற்ற பிறகு உங்களுக்கு வருமானம் வழங்குகின்ற ஒரு திட்டம் ஆகும். இது RRSP க்கு முற்றிலும் எதிர் மாறாகச் செயற்படுகிறது, ஏனெனில் நீங்கள் இதில் பணத்தைச் சேமிப்பதற்குப் பதிலாக எடுக்கிறீர்கள்.

ஒவ்வொரு ஆண்டும் நீங்கள் எவ்வளவு பணம் எடுக்க முடியும் என்பதற்கான விதிகள் இருக்கின்றன.

RRSP போன்ற ஒரு ஓய்வுகாலக் கணக்கிலிருந்து சேமிப்புகளை மாற்றுவதன் மூலம் நீங்கள் ஒரு RRIF -ஐத் தொடங்க முடியும்.

RRIF கட்டணங்கள்

பெரும்பாலான RRIFகளுக்குக் கட்டணம் எதுவும் நிர்ணயிக்கப்படவில்லை, ஆனால் ஒரு திட்டத்தைத் தொடங்கிய பிறகு நீங்கள் ஏனைய கட்டணங்களைச் செலுத்த வேண்டி நேரிடலாம். வருடாந்த நிர்வாக அல்லது அறங்காவலர் கட்டணம், முதலீட்டுக் கட்டணங்கள் மற்றும் உங்கள் RRIF இல் மாற்றங்கள் மேற்கொள்வதற்கான கட்டணங்கள் ஆகியவை இதில் உள்ளடங்கலாம்.

RRIFs பற்றித் தெரிந்துகொள்ள வேண்டிய 6 விடயங்கள்

RRIF அமைக்கப்பட்ட பிறகு, அத்திட்டத்திற்கு மேற்கொண்டு நீங்கள் பங்களிப்புச் செலுத்த முடியாது. ஆயினும், நீங்கள் ஒன்றுக்கு மேற்பட்ட RRIF வைத்திருக்க முடியும்.

உங்கள் RRSP யிலிருந்து பணத்தைப் பரிமாற்றம் செய்து ஒரு RRIF ஐ நீங்கள் தொடங்குகிறீர்கள். ஓய்வூதியத் திட்டங்கள் மற்றும் DPSPs போன்ற இதர பதிவுபெற்ற திட்டங்களிலிருந்து மேற்கொள்ளப்படும் பரிமாற்றங்களும் குறிப்பிட்ட சூழ்நிலைகளின் கீழ் அனுமதிக்கப்படுகின்றன.

ஒரு RRIF இல் என்ன வகையான முதலீடுகளை வைத்திருக்கலாம் என்பதை நீங்கள் தேர்ந்தெடுக்கிறீர்கள். உதாரணங்கள்: GICகள், பன்கூட்டு நிதியங்கள், ETFகள், ஒதுக்கப்பட்ட நிதிகள், பங்குகள் மற்றும் நிதி ஒப்பந்தப் பத்திரங்கள்.

RRIF நீங்கள் இறக்கும்போது உங்கள் RRIF இல் பணம் ஏதாவது இருந்தால், அது உங்களால் நியமிக்கப்பட்ட பயனாளிகளுக்கு அல்லது உங்கள் மரணச்சொத்துக்குச் செல்லும்.

ஒவ்வொரு ஆண்டும் உங்கள் RRIF இலிருந்து குறைந்தபட்சத் தொகையை நீங்கள் எடுக்க வேண்டும். உங்கள் வயது அதிகமாகும் போது இத் தொகை அதிகமாகிறது. அதிகபட்ச பணம் மீள எடுத்தல் வரம்பு இல்லை.

ஒரு RRIF ஐ நீங்கள் 71 வயதை அடையும் வருட முடிவுக்கு முன்னர் எந்த நேரத்திலும் தொடங்கலாம்.

RRIF பணம் மீள எடுத்தல்

நீங்கள் RRIF தொடங்கிய பிறகு அதற்கு அடுத்த ஆண்டிலிருந்து நீங்கள் பணத்தை மீள எடுக்கத் தொடங்கலாம். மத்திய அரசானது, ஒவ்வொரு ஆண்டும் உங்கள் RRIF-இலிருந்து நீங்கள் எடுக்கக் கூடிய குறைந்தபட்சத் தொகையை நிர்ணயித்துள்ளது மற்றும் அது உங்கள் RRIF இன் மதிப்பின் குறிக்கப்பட்ட சதவீதம் ஒன்றை அடிப்படையாகக் கொண்டிருக்கும்.

RDSPs

இயலாமையுள்ளோருக்கான பதிவுபெற்ற சேமிப்புத் திட்டம் (Registered Disability Savings Plan) என்பது உடற்குறைபாடு கொண்டிருக்கும் நபர்களும் அவர்களுடைய குடும்பங்களும் எதிர்காலத்துக்காகச் சேமிக்க உதவுகின்ற ஒரு சேமிப்புத் திட்டம் ஆகும். அரசாங்க உதவித்தொகைகள் உங்கள் சேமிப்புகளுடன் சேர்க்கப்படுகின்றன மற்றும் உங்கள் முதலீடுகள் வரியில்லாமல் வளர்கின்றன.

RDSPs பற்றித் தெரிந்துகொள்ள வேண்டிய 8 விடயங்கள்

பயனாளி உடற்குறைபாடு கொண்ட நபர் ஆவார், எதிர்காலத்தில் அவரே பணம் பெறுவார்.

RDSP தொடங்கி நிர்வகிக்கும் நபரே திட்டத்தை வைத்திருப்பவர் ஆவார். திட்டத்தை வைத்திருப்பவரே பயனாளியாகவும் இருக்க முடியும்.

கனடா உடற்குறையுள்ளோர் சேமிப்பு உதவித்தொகை, மற்றும் கனடா உடற்குறையுள்ளோர் சேமிப்புப் பத்திரம் ஆகியவற்றின் கீழ் 49 வயது வரை RDSP-க்கான அரசாங்க பங்களிப்புகளைப் பெற பயனாளி தகுதியுடையவராகிறார்.

பயனாளி 59 வயதாகும் வரை பங்களிப்புகளைச் செலுத்தலாம்.

பயனாளி தனது 60 வது வயது முதல் திட்டத்திலிருந்து ஒழுங்குமுறையாகக் கொடுப்பனவுகளை எடுக்கத் தொடங்க வேண்டும்.

பங்களிப்புகளுக்கு வருடாந்த வரம்பு ஏதும் இல்லை, ஆனால் ஒரு பயனாளிக்கான ஆயுட்காலப் பங்களிப்பு வரம்பு $200,000 ஆகும்.

பங்களிப்புகளுக்கு வரிக் கழிப்புத் தொகை கிடையாது, ஆனால் உங்கள் சேமிப்புகள் வரியின்றி வளரும். திட்டத்தில் இடப்பட்டிருக்கும் காலம் வரை முதலீட்டு வருமானங்களுக்கு வரி இல்லை.

திட்டம் எங்கு தொடங்கப்பட்டது என்பதைப் பொறுத்து RDSP சேமிப்புகளை பல முதலீடுகளில் வைத்திருக்கலாம்.

RDSP பங்களிப்புகள் மற்றும் பணம் மீள எடுத்தல்கள்

பயனாளி 59 வயதை எட்டும் வருடமுடிவு வரை, அல்லது பங்களிப்பு வரம்பு $200,000 ஐ அடையும் வரை எவரும் RDSP ஒன்றுக்குப் பங்களிப்பு செலுத்த முடியும்.

பொதுவாக, உங்கள் RDSP -யிலிருந்து நீங்கள் பணம் எடுத்தால், 10 ஆண்டுகளுக்குக் குறைவாகத் திட்டத்தில் இருக்கின்ற உதவித்தொகைகள் மற்றும் நிதிப் பத்திரங்களில் சிலவற்றை அல்லது அனைத்தையும் நீங்கள் திருப்பிச் செலுத்த வேண்டும்.

ஒழுங்குமுறையான கொடுப்பனவுகள் 60வது வயதிலிருந்து தொடங்க வேண்டும்

மீண்டும் மீண்டும் தொடர்ச்சியாக ஏற்படும் கொடுப்பனவைச் சுட்டிக் காட்டும் நாட்காட்டி

கொடுப்பனவுகள் குறைந்தபட்சம் ஆண்டுக்கு ஒரு முறையாவது மேற்கொள்ளப்பட வேண்டும்

கொடுப்பனவுகள் பங்களிப்புகளை விஞ்சும் அளவிற்கு இருந்தால் அவற்றுக்கு வரி விதிக்கப்படும்

முதலீட்டுத் திட்டங்கள்

பங்குகள்

ஒரு நிறுவனத்தில் நீங்கள் பங்குகளை (ஷேர்கள் எனவும் அழைக்கப்படுகின்றன) வாங்கும்போது, நீங்கள் அந்த நிறுவனத்தின் ஒரு சிறு பகுதியை வாங்குகிறீர்கள். ஒரு பங்கு என்பது ஒரு நிறுவனத்தின் பகுதியளவு உடைமையுரிமையைக் குறிக்கிறது.

பங்குகளில் முக்கியமான இரண்டு வகைகள் உள்ளன:

பொதுப் பங்கு

விற்கப்படும் பங்குகளில் பெரும்பாலானவை பொதுப் பங்குகள் ஆகும். பங்கு விலைகளின் அதிகரிப்பு மற்றும் ஈவுத்தொகை அதிகரிப்பு வாயிலாகப் பொதுப் பங்குகள் அவற்றின் வளர்ச்சிக்கான ஆற்றலினை வழங்குகின்றன.

முன்னுரிமைப் பங்கு

முன்னுரிமைப் பங்கு நிலையான பங்கு இலாபங்கள் வாயிலாக நிலையான வருமானத்தையும், அதிகரிக்கும் பங்கு விலைகள் வாயிலாக வளர்ச்சிக்கான சாத்தியத்தையும் வழங்குகிறது. முன்னுரிமைப் பங்குகளின் விலைகள் பொதுப் பங்கின் விலைகளை விட அதிக நிலையானவையாகக் கருதப்படுகின்றன.

பங்குகளை வாங்குவதற்கு கட்டணங்கள் விதிக்கப்படுகின்றன, அவை நீங்கள் முதலீடு செய்யத் தேர்ந்தெடுத்துள்ள முதலீட்டு நிறுவனத்தின் வகையைப் பொறுத்து மாறுபடக்கூடும்.

முதலீடு செய்வதற்கான செலவுகள் பற்றிக் கேள்விகள் கேட்க வேண்டியது முக்கியமானது என்பதை நினைவில் வைத்துக்கொள்ளவும்

பங்குகளைப் பற்றி மேலும் அறிக

நிதி ஒப்பந்தப் பத்திரங்கள்

நிதி ஒப்பந்தப் பத்திரம் என்பது அரசாங்கத்துக்கு அல்லது ஒரு நிறுவனத்துக்கு நீங்கள் வழங்கும் ஒரு வகையான கடன் ஆகும்.

நீங்கள் ஒரு நிதி ஒப்பந்தப் பத்திரம் வாங்கும்போது, அரசாங்கத்துக்கு அல்லது ஒரு நிறுவனத்துக்கு (நிதி ஒப்பந்தப் பத்திரம் வழங்குபவர்) குறிப்பிட்ட ஒரு காலத்துக்கு (காலவரையறை) நீங்கள் உங்கள் பணத்தைக் கடனாகத் தருகிறீர்கள். முதிர்வுத் திகதி வரை அப்பத்திரங்களை நீங்கள் உங்களிடம் வைத்திருந்தால், உங்கள் பணம் முழுவதையும் நீங்கள் திரும்பப் பெறுவீர்கள். முதிர்வுத் திகதிக்கு முன்னர் நீங்கள் அப்பத்திரங்களை விற்கும்போது அப்பத்திரங்களின் விலை அதிகரித்திருந்தால் உங்களுக்கு இலாபம் கிடைக்கும், அப் பத்திரங்களின் விலை குறைந்திருந்தால் நீங்கள் நட்டம் அடைவீர்கள்.

பெரும்பாலான நிதி ஒப்பந்தப் பத்திரங்களில், நீங்கள் பத்திரங்களை வைத்திருக்கும்போது வழக்கமான வட்டி பெறுகிறீர்கள். பெரும்பாலான நிதி ஒப்பந்தப் பத்திரங்கள் மாறாத, நிலையான வட்டி விகிதத்தைக் கொண்டிருக்கின்றன. சில நிதி ஒப்பந்தப் பத்திரங்கள் மாறும் வட்டி விகிதங்களைக் கொண்டவையாகும், அவை காலத்துக்கேற்றவாறு அதிகரிக்கின்றன அல்லது குறைகின்றன. நிதி ஒப்பந்தப் பத்திரத்தின் முதிர்வுத் திகதியன்று, அவற்றின் முகப்புப் பெறுமதியை நீங்கள் திரும்பப் பெறுகிறீர்கள்.

நிதி ஒப்பந்தப் பத்திரங்களின் வகைகள்

ஒரு நேர்கோட்டினை நெருக்கமாகப் பின்தொடர்ந்து, மேல்நோக்கிய வண்ணம் செல்லும் அம்புக்குறி

வழக்கமான நிதி ஒப்பந்தப் பத்திரங்கள்

நீங்கள் இந்தப் பத்திரங்களை ஒரு நிர்ணயிக்கப்பட்ட தொகைக்கு, ஒரு நிர்ணயிக்கப்பட்ட காலத்துக்கு வாங்குகிறீர்கள். இப்பத்திரங்களை நீங்கள் உங்களிடம் வைத்திருக்கும்போது அவற்றுக்கு நீங்கள் முறையான வட்டித்தொகை பெறுகிறீர்கள். முதிர்வுத் திகதியன்று, பத்திரத்தின் முகப்புப் பெறுமதியை நீங்கள் திரும்பப் பெறுகிறீர்கள்.

இரு திசைகளில் ஒரு நேர்கோட்டுக்கு மேலும் கீழுமாகச் செல்லும் அம்புக்குறி

சிக்கலான நிதி ஒப்பந்தப் பத்திரங்கள்

இந்தப் பத்திரங்கள் குறிப்பிட்ட சிறப்பம்சங்களைப் பெற்றிருக்கின்றன, அவை உங்கள் முதலீடு மீதான இலாபத்தை அதிகரிக்கக்கூடும். துண்டுப் பத்திரங்கள், குறியீட்டுப் பத்திரங்கள் மற்றும் உண்மையான வருமான நிதிப் பத்திரங்கள் ஆகியவை இவற்றில் உள்ளடங்குகின்றன.

நிதி ஒப்பந்தப் பத்திரங்கள் பற்றி மேலும் அறிக

பன்கூட்டு நிதியங்கள்

பன்கூட்டு நிதியம் என்பது பலரிடமிருந்து பணத்தைத் திரட்டி அதனைப் பங்குகள் மற்றும் நிதிப் பத்திரங்கள் போன்ற முதலீடுகளின் கலவையில் முதலீடு செய்கின்ற ஒரு முதலீட்டுத் திட்டம் ஆகும்.

ஒரு பன்கூட்டு நிதியத்தில், உங்களுடைய பணம் பல முதலீட்டாளர்களிடமிருந்து திரட்டப்பட்ட நிதியுடன் சேர்க்கப்படுவதால், தனிப்பட்ட முறையில் அதிக விலையுள்ளதாகவும் நீங்கள் தனியாக நிர்வகிப்பதற்குச் சிரமமானதாகவும் இருக்கின்ற அதிக எண்ணிக்கையான முதலீடுகளில் நீங்கள் முதலீடு செய்ய முடிகிறது.

ஒரு பன்கூட்டு நிதியம் வாங்குவதுடன் சம்பந்தப்பட்ட பல்வேறு கட்டணங்கள், விற்பனைக் கட்டணம், இதர பரிவர்த்தனைக் கட்டணங்கள், கணக்குக் கட்டணங்கள் மற்றும் நிதியச் செலவுகள் ஆகியவற்றை உள்ளடக்கியிருக்கலாம்.

நீங்கள் எந்த நிதிகளை வாங்குகிறீர்கள், அவற்றை எப்படி வாங்குகிறீர்கள் மற்றும் நீங்கள் அவற்றை எந்தக் கணக்குகளில் வைத்திருக்கிறீர்கள் என்பதைப் பொறுத்து செலுத்த வேண்டிய விற்பனைக் கட்டணங்கள், இதர பரிவர்த்தனைக் கட்டணங்கள், கணக்குக் கட்டணங்கள் மாறுபடக்கூடும். நிதியச் செலவுகளுக்கு நீங்கள் நேரடியாகப் பணம் செலுத்துவதில்லை, ஆனால் அவை நிதியம் மூலம் கிடைக்கும் இலாபத்தைக் குறைக்கக்கூடும் என்பதால் அவை உங்களைப் பாதிக்கின்றன.

பன்கூட்டு நிதியங்களின் வகைகள்

பணச் சந்தை நிதியங்கள்

இந்த நிதியங்கள் குறுகிய-கால நிலையான வருமானப் பத்திரங்களான அரசாங்கப் பத்திரங்கள், திறைசேரி பில்கள், வங்கியாளர்களின் ஏற்புகள், வணிகத் தாள் மற்றும் வைப்புச் சான்றிதழ்கள் போன்றவற்றில் முதலீடு செய்யப்படுகின்றன. இவை பொதுவாகப் பாதுகாப்பான முதலீடாகவும், ஆனால் அதே சமயம் மற்ற வகை பன்கூட்டு நிதியங்களை விடக் குறைவான இலாபம் தரக்கூடியவையாகவும் உள்ளன.

நிரந்தர வருமான நிதியங்கள்

இந்த நிதியங்கள் அரசாங்க நிதிப் பத்திரங்கள், முதலீட்டுத்-தரம் கொண்ட பெருநிறுவனப் பத்திரங்கள் மற்றும் அதிக-வருவாய் ஈட்டும் பெருநிறுவனப் பத்திரங்கள் போன்ற நிலையான வருமானம் தரும் முதலீடுகளை வாங்குகின்றன.

தேறுமதி நிதியங்கள்

இந்த நிதியங்கள் பங்குகளில் முதலீடு செய்கின்றன. இந்த நிதியங்கள் பணச் சந்தை அல்லது நிரந்தர வருமான நிதியங்களை விட விரைவாக வளர்வதை நோக்கமாகக் கொண்டிருக்கின்றன, எனவே இதில் நீங்கள் பணத்தை இழக்க நேரிடுவதற்கான ஆபத்து அதிகம் உள்ளது.

சமநிலைப்பட்ட நிதியங்கள்

இந்த நிதியங்கள் சமபங்கு மற்றும் நிரந்தர வருமானப் பத்திரங்களின் கலவையில் முதலீடு செய்கின்றன. பணத்தை இழக்கும் அபாயத்திற்கு எதிராக அதிக இலாபத்தை அடைவதற்கான நோக்கத்தைச் சமநிலைப்படுத்த அவை முயற்சிக்கின்றன.

குறியீட்டு நிதியங்கள்

இந்த நிதியங்கள் S&P/TSX கூட்டுக் குறியீடு போன்ற குறிப்பிட்ட குறியீட்டின் செயற்திறனைக் கண்காணிப்பதை நோக்கமாகக் கொண்டிருக்கின்றன. குறியீடு அதிகரிக்கும்போது அல்லது குறையும்போது பன்கூட்டு நிதியத்தின் மதிப்பு அதிகரிக்கும் அல்லது குறையும்.

சிறப்பு நிதியங்கள்

இந்த நிதியங்கள், வீடு மற்றும் நிலவுடைமைகள் (றியல் எஸ்டேட்), பொருட்கள் அல்லது சமூகப் பொறுப்புணர்வு முதலீடு போன்ற சிறப்புப் பொறுப்புகளில் கவனம் செலுத்துகின்றன.

நிதியங்களின்-நிதியம்

இந்த நிதியங்கள் பிற நிதியங்களில் முதலீடு செய்யப்படுகின்றன. சமநிலைப்பட்ட நிதியங்களைப் போன்றே, அவை சொத்து ஒதுக்கீடு மற்றும் பல்வகைப்படுத்தலை முதலீட்டாளருக்கு எளிமையாக்க முயற்சிக்கின்றன.

பன்கூட்டு நிதியங்கள் பற்றி மேலும் அறிக

பரிமாற்றம் செய்யும்-வர்த்தக நிதியங்கள்

பரிமாற்றம் செய்யும்-வர்த்தக நிதியம் (Exchange-traded fund (ETF) என்பது முதலீட்டாளர்கள் குழு ஒன்றுக்குச் சொந்தமான பங்குகள் அல்லது பத்திரங்கள் போன்ற முதலீடுகளின் தொகுப்பை வைத்திருக்கின்ற ஒரு முதலீட்டு நிதி, இது ஒரு தொழிற் தேர்ச்சி பெற்ற பண மேலாளரால் நிர்வகிக்கப்படுகிறது. பன்கூட்டு நிதியங்களைப் போன்று அல்லாமல், ETFகள் பங்குச் சந்தையில் மாற்றிக்கொள்ளப்படுகின்றன

ETFகளின் வகைகள்

நேர்கோட்டில் எதிரெதிரே அம்புக்குறிகளைக் காட்டுவது போலமைந்த ஒரு நபருடைய தலையின் பக்கத் தோற்றம்

குறியீட்டு ETFs

இந்த ETFs ஒரு தரக்குறியை நெருக்கமாகப் பின்பற்றும் வகையில் உருவாக்கப்பட்டுள்ளன (உதாரணமாக TSX/S&P 60). இவை செயலற்ற முதலீடுகள் ஆகும் – இவை ஒரு குறியீட்டெண்ணை நெருக்கமாகக் கண்காணிப்பதை நோக்கமாகக் கொண்டுள்ளன, மற்றும் பொதுவாக இவற்றின் ETF கட்டணங்கள் மற்றும் செலவுகள் குறைவு. இந்த ETFs தரக்குறியை மீறிச் சிறப்பாகச் செயற்பட முயற்சிப்பதில்லை.

பல திசைகளில் அம்புக்குறிகளைக் காட்டுவது போலமைந்த ஒரு நபருடைய தலையின் பக்கத் தோற்றம்

செயலூக்கத்துடன் நிர்வகிக்கப்படும் ETFs

செயலூக்கத்துடன் நிர்வகிக்கப்படும் ETFs ஒரு குறியீட்டெண்ணைக் கண்காணிப்பதில்லை. ஒரு செயலூக்கத்துடன் நிர்வகிக்கப்படும் ETF ஆனது ETF -இன் முதலீட்டு நோக்கம் மற்றும் முதலீட்டுத் தொகுப்பு மேலாளரின் உத்தியின் அடிப்படையில் முதலீடுகளை வாங்கி விற்கிறது. பொதுவாக குறியீட்டு ETFs -ஐ விட இதற்கு அதிக கட்டணங்கள் விதிக்கப்படுகிறது.

ETFs பற்றி மேலும் அறிக

நிலவுடைமை (றியல் எஸ்டேட்) முதலீட்டுத் திட்டங்கள்

வீடு மற்றும் நிலவுடைமைச் சொத்தின் மீது முதலீடு செய்வதே வழக்கமாக அதிக செலவாகின்ற மற்றும் நிர்வகிப்பதற்கு அதிக நேரம் தேவைப்படுகின்ற றியல் எஸ்டேட்டில் முதலீடு செய்வதற்கான மிகவும் நேரடியான-வழி ஆகும்.

நேரம், செலவு மற்றும் ஒரு முதலீடாக சொத்து வாங்குவதால் வரும் ஆபத்து ஆகியவற்றின் காரணமாக, அதற்குப் பதிலாக நீங்கள் சுயமாகச் சொத்துக்களை நிர்வகிக்கவும் வைத்திருக்கவும் தேவையற்ற விதத்தில் , றியல் எஸ்டேட் சந்தைக்கான வாய்ப்பை உங்களுக்கு வழங்குகின்ற நிதியங்கள், அறக்கட்டளைகள் மற்றும் பிற முதலீட்டுத் திட்டங்கள் வாயிலாக றியல் எஸ்டேட்டில் முதலீடு செய்ய நீங்கள் தேர்ந்தெடுக்கலாம்.

பொது-வர்த்தகம் செய்யும் றியல் எஸ்டேட் நிறுவனத்தின் பங்கு போன்ற இந்தத் திட்டங்களை வாங்குவதன் மூலம், நீங்கள் தனிப்பட்ட முறையில் எந்தச் சொத்துக்களையும் பராமரிக்காமல் றியல் எஸ்டேட் சந்தையில் முதலீடு செய்கிறீர்கள்.

றியல் எஸ்டேட் முதலீடுகளைப் புரிந்துகொள்ளுதல்

நிலவுடைமை முதலீட்டு நம்பிக்கை நிதியம் (REAL ESTATE INVESTMENT TRUST)

REAL ESTATE INVESTMENT TRUST, அல்லது “REIT,” என்பது சொந்தமாக றியல் எஸ்டேட் வைத்திருக்கும் ஒரு நிறுவனம் ஆகும். REITs பொதுவாக மிகப் பெறுமதி-மிக்க சொத்துக்களாகிய அலுவலகக் கட்டடங்கள், வணிகச்சாவடிகள், ஹோட்டல்கள், களஞ்சியக் கட்டிடங்கள்மற்றும் தொடர்மாடிக் குடியிருப்புகள் போன்றவற்றைச் சொந்தமாக வைத்திருக்கின்றன. ஒரு REIT -இல் முதலீடு செய்வதன் மூலம், அறக்கட்டளை தனக்குச் சொந்தமான சொத்துக்களிலிருந்து பெறுகின்ற வரவுத்தொகைகள் வாயிலாகப் பெறுகின்ற வருமானத்தைப் பெற நீங்கள் தகுதியுடையவர் ஆகிறீர்கள்.

வரையறுக்கப்பட்ட கூட்டாண்மை

நிலவுடைமை முதலீட்டு வரையறுக்கப்பட்ட கூட்டாண்மை,(REAL ESTATE LIMITED PARTNERSHIP) அல்லது “LP,” ஆனது பொதுவாக ஒரு சொத்தை உருவாக்குவதற்கு அல்லது ஏற்கனவே கட்டப்பட்ட சொத்துக்களை நிர்வகிப்பதற்குப் பயன்படுத்தப்படுகிறது. றியல் எஸ்டேட் LP ஐ நிர்வகிக்கின்ற பொதுப் பங்குதாரர் நிலத்தை வாங்கி அதை மேம்படுத்துவதற்கு அல்லது அதிக விலைக்கு அதை விற்பனை செய்வதற்கு முதலீட்டாளர்களின் பணத்தைப் பயன்படுத்தலாம், அதன் மூலம் நிலத்தின் அல்லது வளர்ச்சித் திட்டத்தின் பெறுமதி அதிகரித்தால் முதலீட்டாளர்களின் முதலீடு வளர்வதற்கான வாய்ப்புக் கிடைக்கிறது.

அடமானக் கடனை முதலீடு செய்தல் (MORTGAGE INVESTMENT ENTITY)

MORTGAGE INVESTMENT ENTITY, அல்லது “MIE,” ஆனது முதலீட்டாளர்களிடமிருந்து பணம் திரட்டி, அதை வங்கிகள் அல்லது கடன் சங்கங்கள் போன்ற பாரம்பரிய கடன் கொடுப்பவர்களிடமிருந்து அடமானக் கடன் பெற முடியாத நபர்களுக்கு கடன் கொடுக்கின்ற அடமான-நிதி வணிகம் ஆகும்.

கூட்டு அடமானம்

கூட்டு அடமானம் என்பது ஒரு சொத்துக்காக ஒரே அடமானத்தில் நேரடியாக முதலீடு செய்துள்ள இரண்டு அல்லது அதற்கு மேற்பட்ட முதலீட்டாளர்களால் வழங்கப்படும் அடமானம் ஆகும். MIE யில் செய்யப்படும் முதலீட்டைப் போல் அல்லாமல், ஒரு கூட்டு அடமான முதலீடானது, அடமானங்களின் தொகுப்பை விட ஒரு தனி அடமானத்துக்கே பொருந்துகின்றது.

GetSmarterAboutRealEstate.ca -ஐப் பார்வையிடவும்

ஆபத்து மற்றும் இலாபத்தைப் புரிந்துகொள்ளுதல்

ஆபத்து என்பது முதலீட்டின் மீதான இலாபத்தின் எதிர்பார்ப்பு உண்மையான இலாபத்திலிருந்து வேறுபடுவதற்கான சாத்தியத்தையும், நீங்கள் முதலீடு செய்துள்ள பணத்தில் சிலவற்றை அல்லது அனைத்தையும் இழக்கும் திறனையும் உள்ளடக்குகிறது. உங்கள் பணத்தில் இலாபம் ஈட்டுவதற்காக நீங்கள் முதலீடு செய்கிறீர்கள், ஆனால் இலாபம் மட்டுமே கருத்தில் கொள்ளப்படுவதில்லை. ஆபத்தும் இலாபமும் ஒன்றோடொன்று இணைந்தவை. பொதுவாக, அதிக ஆபத்தை எதிர்கொண்டு ஒரு முதலீடு செய்யப்படும்போது, அதற்கான இலாபமும் அதிகமாக இருக்கும். உங்களுடைய இடர் ஏற்புத்திறன் குறைவாக இருந்தால், நீங்கள் அனேகமாக இடர் குறைந்த திட்டங்களைத் தேர்ந்தெடுப்பதற்கான சாத்தியம் உள்ளதனால் உங்களுக்குக் கிடைக்கும் இலாபமும் குறையும். நீங்கள் அதிக இடர் ஏற்புத்திறன் கொண்டவராக இருந்தால், நீங்கள் அனேகமாக அதிக ஆபத்து கொண்ட முதலீட்டுத் திட்டத்தைத் தேர்ந்தெடுப்பதற்கான வாய்ப்பு உள்ளது, எனவே உங்களுக்குக் கிடைக்கும் இலாபமும் அதிகரிப்பதற்கான சாத்தியமுள்ளது.

முதலீட்டு ஆபத்துகளின் வகைகள்

நீங்கள் முதலீடு செய்யும்போது, நீங்கள் பல்வேறு வகையான ஆபத்துக்கு முகம் கொடுக்கிறீர்கள்.

ஆபத்துகள் பற்றி மேலும் அறிக

முதலீட்டு மோசடியைக் கண்டறியக் கற்றுக்கொள்ளுங்கள்

உண்மையென நம்பமுடியாத அளவுக்கு ஏதாவது ஒன்று மிகமிக நன்றாக இருப்பதாகத் தோன்றுமாயின், அநேகமாக அது நன்மையானதாக இருக்க முடியாது என்று ஒரு பழமொழி உண்டு. மோசடியான முதலீட்டு வாய்ப்புகளும் அவற்றை விற்க முயற்சிக்கும் நபர்களும் சில நேரங்களில் மிகவும் நம்பிக்கைக்குரியவர்களாகத் தோன்றலாம், எனவே சில பொதுவான மோசடிகள் எப்படி இருக்கும், அவை எங்கு நிகழக்கூடும் என்பதை அறிந்துகொள்ள வேண்டியது முக்கியமாகும்.

முதலீட்டாளர்கள் தங்கள் வாழ்க்கையின் சேமிப்புகள் சிலவற்றையோ அல்லது முழுவதையுமோ மோசடியாளர்களிடம் இழந்துவிடக் கூடும். பல பேர் பெரும்பாலும் சங்கடம் காரணமாகவோ அல்லது தனது நண்பர்களிடமும் குடும்பத்தினரிடமும் தனக்குப் பின்னடைவு ஏற்பட்டுவிடும் என்ற பயத்தின் காரணமாகவோ மோசடி பற்றிப் புகார் தெரிவிப்பதில்லை. அந்தக் குழுவிற்குள்ளேயே பிரச்சனைகளுக்குத் தீர்வு காண அவர்கள் முயற்சிக்கலாம், இதன் காரணமாக மற்றவர்களும் அதே மோசடியால் பாதிக்கப்படக்கூடும்.

உங்களுக்கும் நீங்கள் கடுமையாக உழைத்துச் சம்பாதித்த பணத்துக்கும் இடையே உள்நுழைய மோசடியாளர்கள் அதிக முயற்சி செய்வார்கள். எதைக் கவனிக்க வேண்டும் என்பதைத் தெரிந்துகொள்வது முதலீட்டு மோசடிகளால் நீங்கள் பணம் இழப்பதைத் தவிர்க்க உதவக்கூடும்.

முதலீட்டு மோசடியின் பொதுவான அறிகுறிகள்

குறைந்த ஆபத்தில் அல்லது ஆபத்தே இல்லாமல் அதிக இலாபம்

பொதுவாக, ஒரு முதலீட்டின் மீது அதிக இலாபம் கிடைப்பதற்கான சாத்தியக்கூறு நிலவும் சூழ்நிலைகளில், அந்த முதலீட்டின் மீதான ஆபத்தும் அதிகம் இருக்கும். ஒரு முதலீடு குறைந்த ஆபத்தில் அல்லது ஆபத்தே இல்லாமல் அதிக இலாபம் கொடுப்பதாக ஒருவர் உங்களிடம் உறுதிமொழி வழங்கினால், அவர் வழங்கும் அந்த முதலீட்டு வாய்ப்பு மோசடியாகத் தான் இருக்கும்.

“சூடான குறிப்பு” அல்லது உள்நபர் தகவல்

“சூடான குறிப்புகள்” அல்லது “உள்நபர் தகவல்களுக்கான” ஆதாரங்கள் என்பன உங்கள் நலன்களை அடிப்படையாகக் கொண்டு அமைவதில்லை. அவர்கள் ஏன் உங்களுக்குக் குறிப்புகள் வழங்குகிறார்கள் என்பதையும், அவற்றைப் பற்றிச் சொல்வதால் அவர்களுக்கு என்ன பலன் கிடைக்கிறது என்பதையும் பற்றிச் சிந்தியுங்கள். அது ஒரு பொது நிறுவனம் பற்றிய உண்மையான உள்நபர் தகவலாக இருந்தால், அதற்கமைய செயற்படுவது உள்நபர் வர்த்தகச் சட்டங்களின் கீழ் சட்ட விரோதமானதாகும்.

வாங்குவதற்கான அழுத்தம்

மோசடி செய்பவர்கள் உங்களிடம் விரைவாகப் பணம் பெற்று, பின்னர் அடுத்த நபரிடம் மோசடியில் ஈடுபடச் செல்வதற்காக அதிக அழுத்தம் தரக்கூடிய விற்பனைத் தந்திரங்களை அடிக்கடி கையாளுகிறார்கள். உடனடியாகவே ஒரு முடிவெடுக்குமாறு நீங்கள் கேட்கப்பட்டாலோ அல்லது வரையறுக்கப்பட்ட -கால சலுகை உங்களுக்கு வழங்கப்பட்டாலோ மிகவும் எச்சரிக்கையுடன் இருக்கவும்.

முதலீடுகளை விற்பதற்கு அவர் பதிவு செய்யப்படவில்லை

நீங்கள் முதலீடு செய்வதற்கு முன்னர், உங்களுக்கு முதலீடு வழங்கும் நபரின் பதிவு விவரங்களைச் சரிபார்க்கவும். பொதுவாக, நிதிப் பத்திரங்களை விற்பனை செய்கின்ற அல்லது முதலீட்டு ஆலோசனை வழங்குகின்ற ஒருவர் அவருடைய மாகாணப் பத்திரங்கள் கட்டுப்பாட்டாளரிடம் பதிவு செய்திருக்க வேண்டும்.

மோசடி பற்றி முறையிட நீங்கள் தயக்கம் காட்டலாம், ஆனால் முதலீட்டு மோசடி யாருக்கு வேண்டுமானாலும் ஏற்படலாம் என்பதை நீங்கள் நினைவில் கொள்ளவேண்டியது முக்கியமாகும். ஒரு மோசடியாளர் உங்களை அணுகியதாகவோ அல்லது நீங்கள் மோசடி செய்யப்பட்டிருக்கலாம் என்றோ சந்தேகித்தால் உடனடியாக எம்மைத் தொடர்புகொள்ளவும்.

முதலீட்டு மோசடிகளைத் தவிர்த்தல்

உங்களுக்குத் தேவைப்படும் நேரம் எடுத்துக்கொள்ளவும்

வரையறுக்கப்பட்ட-நேர சலுகைகள் மற்றும் அதிக அழுத்தம் தரும் விற்பனையாளர்களிடம் கவனமாக இருக்கவும். முதலீடு சட்டரீதியானதாக இருந்தால், நீங்கள் அந்த இடத்திலேயே உடனடியாக முதலீடு செய்யவேண்டிய தேவையில்லை. சரியான தகவலறிந்து ஒரு முடிவு எடுப்பதற்கு உங்களுக்குத் தேவைப்படும் நேரம் எடுத்துக்கொள்ளுங்கள்.

இரண்டாவது கருத்தைப் பெற்றுக் கொள்ளவும்

தொலைபேசி வாயிலாக, கணனியில் அல்லது அறிமுகமானவர்களிடம் இருந்து நீங்கள் பெறும் கோரப்படாத முதலீட்டு வாய்ப்புகள் குறித்து சந்தேகம் கொள்ளுங்கள். நீங்கள் முதலீடு செய்வதற்கு முன், எம்மை அழையுங்கள் அல்லது ஒரு பதிவுபெற்ற அதிகாரி என உங்களுக்கு உறுதியாகத் தெரிந்த ஒருவரிடம் இரண்டாவது கருத்தைப் பெறுங்கள். ஒரு வழக்கறிஞர் அல்லது ஒரு கணக்காளரிடம் ஆலோசனை கேட்பதற்கும் நீங்கள் விரும்பலாம்.

முதலீட்டை ஆராய்ச்சி செய்யவும்

எந்த ஒரு முதலீடும் செய்வதற்கு முன், அது எப்படி வேலை செய்கிறது என்பதையும், அதனுடன் தொடர்புடைய ஆபத்துகள் மற்றும் கட்டணங்கள் பற்றியும் புரிந்துகொள்ளுங்கள். கேள்விகள் கேட்கப் பயப்படக் கூடாது. உங்கள் நிதி இலக்குகள் மற்றும் தேவைகளுக்கு அது பொருத்தமானதாக இருப்பதை உறுதி செய்துகொள்ளுங்கள்.

பதிவைச் சரிபார்க்கவும்

நிதிப் பத்திரங்களை விற்பனை செய்கின்ற அல்லது முதலீட்டு ஆலோசனை வழங்குகின்ற ஒரு நபர் அவரது மாகாணத்தின் நிதிப் பத்திரங்கள் கட்டுப்பாட்டாளரிடம் பதிவு செய்திருக்க வேண்டும்

பதிவைச் சரிபார்த்தல் பற்றி மேலும் அறிக (ஆங்கிலம்/பிரெஞ்ச் மொழியில் மட்டும்)

மோசடிகள் மற்றும் ஊழல்கள்

மோசடிகளும் ஊழல்களும் பல வழிகளில் வருகின்றன, ஆனால் அவை அனைத்தும் பொதுவான கூறுகளால் இணைக்கப்பட்டுள்ளன. உங்களையும் உங்கள் பணத்தையும் பாதுகாக்க நீங்கள் என்ன செய்ய முடியும் என்பதை அறிந்துகொள்ளுங்கள்.

பொதுவான மோசடிகளும் ஊழல்களும்

இணக்க மோசடி

இணக்க மோசடி என்பது முதலீட்டு மோசடியின் ஒரு வடிவமாகும், இதில் மோசடி செய்பவர்கள் பாதிக்கப்பட்டவர்களை அவர்களுடைய குழு அல்லது சமூக அமைப்பு வாயிலாக அணுகுகிறார்கள். இந்தக் குழுக்கள் மதக் குழுக்களாக, இனக் குழுக்களாக, அல்லது தொழிற்சங்கங்கள் போன்ற தொழிலாளர் சமூகமாக அல்லது இராணுவமாகக் கூட இருக்கலாம்.

விலக்களிக்கப்பட்ட நிதிப் பத்திரங்கள் ஊழல்

தனியாகப் பார்க்கும்போது, விலக்களிக்கப்பட்ட நிதிப் பத்திரங்கள் ஊழல்கள் ஆகாது. ஆனால் ஊழல்புரியும் சிலர், மோசடியான முதலீடுகளை “விலக்களிக்கப்பட்ட” பத்திரங்கள் என்று சொல்கிறார்கள். விரைவில் ”பகிரங்கப்படுத்தப்படப் போகும்” ஒரு நம்பிக்கைக்குரிய வணிகத்தின் நம்பகமான உதவிக்குறிப்பு பற்றி உங்களுக்குக் கோரப்படாத தொலைபேசி அழைப்பு ஒன்று வந்தால் கவனமாக இருக்கவும், மற்றும் அதைச் சரிபார்க்க உங்கள் உள்ளூர் நிதிப் பத்திரங்கள் கட்டுப்பாட்டாளரைத் தொடர்புகொள்ளவும்.

அந்நிய செலாவணி (Forex) ஊழல்

அந்நிய செலாவணி (Forex) விளம்பரங்கள் பெரும்பாலும் பயிற்சிகள் அல்லது மென்பொருள் வாயிலாக அந்நியச் செலாவணி சந்தைக்கு எளிதான அணுகலை ஊக்குவிக்கின்றன.. ஆனால் அந்நியச் செலாவணி வர்த்தகமானது , முன்னணியில் உள்ள நவீன தொழில்நுட்பம் மற்றும் பெரிய கணக்குகள் ஆகியவற்றுக்கான அணுகலைப் பெற்றுள்ள, நன்கு பயிற்சி பெற்ற ஊழியர்களைக் கொண்ட பெரிய, சிறந்த-வளம் கொண்ட சர்வதேச வங்கிகளின் ஆதிக்கத்தின் கீழ் உள்ளது. இந்த வல்லுநர்களை வெல்வது மிகவும் கடினம்.

அந்நிய நாட்டு முதலீட்டு மோசடி

இந்த மோசடி மூலம் உங்கள் பணத்தை “கடல் தாண்டி” வேறொரு நாட்டுக்கு நீங்கள் அனுப்பினால் உங்களுக்குப் பெருமளவு இலாபம் கிடைப்பதை இது உறுதிப்படுத்துகிறது. வழக்கமாக இதன் இலக்கு உங்கள் வரிகளைக் குறைப்பது அல்லது தவிர்ப்பது ஆகும், ஆனால் இறுதியில் நீங்கள் வரிகள், வட்டி மற்றும் அபராதங்களின் பெயரால் அரசாங்கத்துக்குப் பணம் செலுத்த வேண்டி நேரிடலாம். மேலும், ஏதாவது தவறு நிகழ்ந்துவிட்டால், உங்கள் வழக்கைக் கனடாவில் உள்ள உரிமையியல் நீதிமன்றத்துக்கு நீங்கள் எடுத்துச் செல்ல முடியாது.

பொன்சி (Ponzi) அல்லது பிரமிட் மோசடி

இந்தத் திட்டங்கள், வீட்டிலிருந்தே வேலை செய்வதன் மூலம் நீங்கள் அதிக பணம் சம்பாதிக்க முடியும் அல்லது $10 ஐ சில வாரங்களிலேயே $20,000 ஆக மாற்ற முடியும் போன்ற உறுதிகளை வழங்குகின்ற விளம்பரங்கள் மற்றும் மின்னஞ்சல்கள் வாயிலாக மக்களைப் பணிக்கமர்த்துகின்றன. அல்லது, ஒரு பெரிய முதலீட்டில் பணக்காரர்களாகப் போகும் முதலீட்டாளர்கள் சிறப்புக் குழுவில் சேர உங்களுக்கு வாய்ப்பு வழங்கப்படலாம். இதற்கான அழைப்பு உங்களுக்குத் தெரிந்த ஒருவரிடமிருந்து கூட உங்களுக்கு வரலாம்.

பம்ப் மற்றும் டம்ப் (Pump and dump) மோசடி

குறைந்த-விலை கொண்ட பங்குகளை விளம்பரப்படுத்தி விலை உயர்த்துவதற்கு, மோசடி செய்பவர் உங்களைத் தொடர்புகொள்கிறார். உங்களுக்குத் தெரியாதது என்னவென்றால், மோசடி செய்பவர் இந்தப் பங்குகளில் அதிகளவினை ஏற்கனவே சொந்தமாக வைத்திருப்பார். நீங்களும் மற்ற முதலீட்டாளர்களும் பங்குகளை வாங்கும்போது, பங்குகளின் மதிப்பு உயர்கிறது. உச்ச விலை வரும்போது, மோசடி நபர் தனது பங்குகளை விற்றுவிடுகிறார், அதன் பிறகு பங்குகளின் மதிப்பு சரிகிறது. அதனால் உங்களிடம் இருக்கும் பங்குகள் பயனற்றதாகின்றன.

முற்பணக் கட்டணத் திட்டம்

இந்த மோசடியில், பாதிக்கப்பட்டவர் கணிசமான அளவு அதிக இலாபம் தருவதாக உறுதியளிக்கின்ற ஒரு முதலீட்டு வாய்ப்பைப் பயன்படுத்திக் கொள்வதற்காக முன்கூட்டியே பணம் செலுத்துமாறு வற்புறுத்தப்படுகிறார். ஆனால் மோசடி நபர் அந்தப் பணத்தை எடுத்துக்கொள்கிறார், அதன் பிறகு பாதிக்கப்பட்டவர் அவரைத் தொடர்புகொள்ளவே முடிவதில்லை. ஒரு ஆபத்தான முதலீட்டில் பணத்தை இழந்த முதலீட்டாளர்களே பெரும்பாலும் குறிவைக்கப்படுகிறார்கள்.

நீங்கள் ஒரு புதிய முதலீடு செய்வது பற்றிப் பரிசீலித்துக் கொண்டிருக்கிறீர்களா?

மோசடியின் எச்சரிக்கை அறிகுறிகளை எப்படி கண்டறிவது என்பதைக் கற்றுக்கொள்ளவும், சந்தேகத்திற்குரிய மோசடிகளிலிருந்து உங்களை எப்படிப் பாதுகாத்துக் கொள்வது என்பதை அறிந்துகொள்ளவும் எங்களது Scam Spotter கருவியைப் பயன்படுத்தவும்.

Scam Spotter

கனடாவில் வயதானவர்கள்

வயதான கனடியர்களுக்கு ஓய்வு காலத்துக்குத் திட்டமிடுதல் முதல், கடனைத் திருப்பிச் செலுத்துதல், குடும்ப உறுப்பினர்களுக்கு உதவுதல், பணி ஓய்வுக் காலத்தில் வாழ்க்கை நடத்துதல் மற்றும் மரணச்சொத்தினைத் (எஸ்டேட்) திட்டமிடல் வரை பலதரப்பட்ட நிதித் தேவைகள் இருக்கின்றன.

வாழ்க்கையின் இந்த நிலையில் நிதி சார்ந்த கேள்விகள் தொடர்பாக பதிலளிப்பதற்கான சில ஆதாரவளங்கள் இங்கு கொடுக்கப்பட்டுள்ளன.

ஓய்வுகாலத் திட்டமிடல்

நீங்கள் எந்த வகையான வாழ்க்கை முறையை வாழ விரும்புகிறீர்கள், அதற்கு நீங்கள் எவ்வளவு சேமிக்க வேண்டும் மற்றும் நீங்கள் வேலை செய்வதை நிறுத்திய பிறகு உங்கள் பணத்தை எவ்வாறு நிர்வகிப்பது ஆகியவற்றைத் தீர்மானிக்க ஓய்வுகாலத் திட்டமிடல் உங்களுக்கு உதவுகிறது.

ஓய்வுகாலத் திட்டமிடல் என்பது உங்கள் ஓய்வுகால ஆண்டுகளைப் பயனுள்ளதாக ஆக்கும் விதமாக உங்கள் பணத்தை நிர்வகிப்பது பற்றியதாகும். உங்கள் ஓய்வுகாலத் திட்டமானது உங்கள் தேவைகள், விருப்பங்கள் என்பவற்றை உங்கள் நிதிகளின் உண்மையான நிலைமையுடன் சமப்படுத்துவதாக இருக்க வேண்டும்.

ஓய்வுகாலத் திட்டம் ஒன்று வைத்திருக்க வேண்டும்என்பதற்கான 3 காரணங்கள்

இலக்குகளை நிர்ணயிக்கவும்

நீங்கள் வேலை செய்வதை நிறுத்த விரும்பும் வயது மற்றும் உங்கள் வாழ்க்கை முறை உள்ளிட்ட ஓய்வுகாலத்திற்கான இலக்குகளை நிர்ணயிக்க ஒரு திட்டம் உங்களுக்கு உதவுகிறது.

எவ்வளவு சேமிக்க வேண்டும் என்பதை அறிந்துகொள்ளவும்

ஓய்வுகாலத்தில் வசதியாக வாழ எவ்வளவு பணம் உங்களுக்குத் தேவை என்பதைக் கண்டுபிடிக்க இது உங்களுக்கு உதவும்.

கையடையாளம் ஒன்று, ஏதாவது ஒன்றைத் தேர்ந்தெடுப்பது போல உள்ள வட்டங்களின் கட்டம்

எதை முதலீடு செய்ய வேண்டும் என்பதைத் தெரிவு செய்யவும்

உங்கள் குறிக்கோள்கள் மற்றும் உங்களுடைய ஆபத்து ஏற்புத்தன்மையின் அடிப்படையில் முதலீட்டுத் தெரிவுகளை மேற்கொள்ள ஒரு திட்டம் உங்களுக்கு வழிகாட்டியாக விளங்கும்.

சேமிப்பு
நீங்கள் எவ்வளவு சேமிக்க வேண்டும் என்பது 3 விடயங்களைச் சார்ந்திருக்கிறது:

உங்கள் வயது

நீங்கள் எப்போது சேமிக்கத் தொடங்குகிறீர்கள் என்பது நீங்கள் எவ்வளவு ஒதுக்கி வைக்கவேண்டும் என்பதில் ஒரு பெரிய வித்தியாசத்தை ஏற்படுத்துகிறது. மிகவும் இளம் வயதிலேயே நீங்கள் சேமிக்கத் தொடங்கும்போது, சிறிதளவு தொகையை நீங்கள் ஒதுக்கி வைத்தால் போதும், கூட்டுவட்டியின் பலனை நீங்கள் அனுபவிக்க முடியும். நீங்கள் எவ்வளவு சேமிக்க முடியும் என்பதைக் காண இந்தக் கணிப்பானைப் பயன்படுத்தவும்.

உங்கள் வாழ்க்கை முறை

நீங்கள் வீட்டிலேயே இருக்கத் திட்டமிட்டுள்ளீர்களா அல்லது உலகம் முழுவதும் பயணம் செய்யப் போகிறீர்களா? நீங்கள் சேமிக்க வேண்டிய தொகை ஓய்வு பெறும்போது நீங்கள் வாழத் திட்டமிட்டுள்ள வாழ்க்கையைப் பொறுத்தது.

மத்திய அரச அனுகூலங்கள்

கனடா ஓய்வூதியத் திட்டம் (Canada Pension Plan (CPP), மூத்தோருக்கான நிதித் திட்டம் (Old Age Security (OAS) மற்றும் உத்தரவாதமுடைய வருமானச் சேர்ப்புதவி (Guaranteed Income Supplement (GIS) போன்ற அரசாங்க ஓய்வுகாலப் பலன்களைப் பெறுவதற்கான தகுதி உங்களுக்கு இருக்கலாம். இந்த அரசாங்கத் திட்டங்களிலிருந்து வருமானம் பெறுவதற்கு நீங்கள் தகுதியுடையவராக இருந்தால், நீங்கள் அதிகமாகச் சேமிக்க வேண்டியதில்லை.

முதியோருக்கான வரிக்கழிவு பெற நீங்கள் தகுதியுடையவரா?

ஒரு முதியோராக, குறிப்பிட்ட வரிக்கழிவு பெறுவதற்கு நீங்கள் தகுதி பெற்றிருக்கலாம். மருத்துவச் செலவுகள் மற்றும் பராமரிப்பாளர் செலவுகள் போன்ற செலவுகளையும் நீங்கள் கோரலாம்.

நிதித் துஷ்பிரயோகம்

முதுமையுடன் சேர்ந்து வரக்கூடிய உடல்நல, இயக்க அல்லது அறிவாற்றல் மாற்றங்கள் வாழ்க்கையின் பிற்காலத்தில் ஒரு நபரின் முடிவெடுக்கும் திறனைப் பாதிக்கக்கூடும், அத்துடன் நிதி சுரண்டல் மற்றும் மோசடிகளாலும் அவர்கள் எளிதில் பாதிக்கப்படுவார்கள். இந்தக் காரணிகள் வெவ்வேறு நபர்களை அவர்கள் வாழ்க்கையின் வெவ்வேறு பகுதிகளில், முக்கியமாக வெவ்வேறு அளவுகளில் பாதிக்கக்கூடும் என்பதை அறிந்திருப்பதும் முக்கியமாகும்.

யாராவது பணத்தைத் திருடுகிறார்கள் அல்லது அவர்களுக்குப் பணம் கொடுக்குமாறு உங்களைத் தூண்டுகிறார்கள் என்பதாகவோ கணக்குகளை அல்லது நிதி அதிகாரத்தை அணுகுவதாகவோ நீங்கள் கருதினால் அல்லது சந்தேகித்தால், அவ்வாறான நடத்தையை நிறுத்த உதவுவதற்கு நீங்கள் எடுக்கக்கூடிய சில நடவடிக்கைகள் இங்கு கொடுக்கப்பட்டுள்ளன:

நீங்கள் நம்புகின்ற ஒருவரிடம் பேசுங்கள்.

இது உங்கள் அயல் வீட்டுக்காரராகவோ, ஒரு குடும்ப உறுப்பினராகவோ, ஒரு உடல்நலப் பராமரிப்பாளராகவோ அல்லது உங்கள் சமூகத்தைச் சேர்ந்த வேறொரு நபராகவோ இருக்கலாம். உங்களுக்கு உதவி பெற்றுத்தர அவர்கள் உதவ முடியும்.

உங்கள் நிதிப் பதிவேடுகளின் பிரதிகளைப் பெற்றுக் கொள்ளுங்கள்

உங்கள் வங்கி, முதலீடு மற்றும் ஓய்வூதியப் பதிவுகளை ஆய்வு செய்து ஏதாவது சந்தேகத்திற்கிடமான செயற்பாடு இருக்கின்றதா என்பதைச் சரிபார்த்துக் கொள்ளவும். பணமாக்கப்பட்ட காசோலைகளின் பிரதிகளையும் நீங்கள் கேட்கலாம். உங்கள் உயில், செயலுரிமை அதிகாரம் மற்றும் பிற முக்கியமான ஆவணங்களையும் நீங்கள் மீளாய்வு செய்ய விரும்பலாம். ஏதாவது தெளிவாகத் தெரியவில்லை என்றால், உங்கள் வங்கியுடன் அல்லது நிதிப் பிரதிநிதியுடன் நேரடியாகப் பேசவும்.

நிபுணர்களுடன் பேசுங்கள்

உங்கள் நிதி சார்ந்த நலன்களைக் கவனிப்பதில் உங்களுக்கு உதவக்கூடிய நபர்கள் இருக்கிறார்கள். இதில் உங்கள் வழக்கறிஞர் அல்லது கணக்காளரும் உள்ளடங்குவார்.

காவற்துறையிடம் பேசுங்கள்

மோசடி என்பது தீவிரமாக எடுத்துக்கொள்ளப்படும் கடுமையான குற்றம் ஆகும். அவசரநிலைப் பிரிவில்-இல்லாத காவற்துறைப் பணியாளர் சந்தேகத்திற்கிடமான செயற்பாடு பற்றி விசாரிப்பதற்கும், சட்டத்தை மீறுபவர்கள் மீது குற்றச்சாட்டைப் பதிவு செய்வதற்கும் உதவ முடியும்.

உங்களுக்கு ஆலோசனை வழங்கக்கூடிய நிறுவனங்களை அணுகவும்

ஒன்ராறியோ முதியோர் துஷ்பிரயோக தடுப்பு அமைப்பு ஒரு Seniors Safety Line (SSL):
1-866-299-1011

ஐக் கொண்டிருக்கிறது. இது பல மொழிகளில் 24/7 நேரமும் கிடைக்கும் ஒரு சேவையாகும் அத்துடன், மக்கள் தங்கள் பிரச்சனைகளைப் பாதுகாப்பாகவும் இரகசியமாகவும் கலந்துரையாடுவதற்கு இது இடமளிக்கின்றது.

இந்தக் குறிப்புகள் நிதித் துஷ்பிரயோகத்திலிருந்து உங்களைப் பாதுகாத்துக் கொள்ள உதவும்:

உங்கள் குடும்பத்தினர், நண்பர்கள் மற்றும் உங்கள் சமூகத்துடன் தொடர்பில் இருக்கவும்

உங்கள் வங்கிக் கணக்கில் பில்கள் மற்றும் பணம் செலுத்தல்களுக்கு தானியங்கிக் கொடுப்பனவுகளை அமைத்துக்கொள்ளுங்கள்; அசாதாரணமான விடயங்கள் இருந்தால் உங்கள் நிதிப் பதிவுகளை மீளாய்வு செய்யவும்

உங்கள் தனிப்பட்ட மற்றும் நிதித் தகவல்களைப் (PIN, கடவுச்சொற்கள் போன்றவை) பாதுகாப்பாக வைத்துக்கொள்ளவும், இந்தத் தகவல்களைப் பகிரக்கூடாது

நீங்கள் விரும்பினால் மட்டுமே பணம் கடன் கொடுங்கள், திருப்பிச் செலுத்துவதற்கு கையொப்பமிட்ட ஆவணத்தைப் பராமரிக்கவும்

உங்களையும் உங்கள் நிதி விடயங்களையும் கவனித்துக்கொள்ள உங்கள் நம்பிக்கைக்குரிய ஒருவருக்கு நீடித்த அல்லது தொடர்ச்சியான செயலுரிமை அதிகாரம் வழங்குங்கள்

நீங்கள் கையெழுத்திடுவதற்கு முன்பு எல்லா ஆவணங்களையும் சரியாகப் புரிந்துகொள்ளவும்

முதியோர் துஷ்பிரயோகம் பற்றி நன்கு புரிந்துகொள்ள Canadian Network for the Prevention of Elder Abuse (CNPEA)-ஐப் பார்வையிடுங்கள், அதில் ஒவ்வொரு மாகாணத்திலும் வசிக்கும் கனடியர்களுக்கான குறிப்புகளும் ஆதாரங்களும் உள்ளன. மேலும் அறிந்துகொள்ள www.cnpea.ca -ஐப் பார்வையிடவும்.

உண்மைத் தரவு அட்டைகள்

உண்மைத் தரவு அட்டைகள் என்பவை மூன்றாம்-தரப்பு வலைத்தளங்களில் பதிக்கப்படக்கூடிய முதலீட்டுத் தலைப்புகள் சார்ந்த பாரபட்சமற்ற தகவல்களைக் கொண்டுள்ள இலவச டிஜிட்டல் அட்டைகள் ஆகும்.

முதலீட்டு மோசடிகளின் அபாய அறிவிப்புகள் முதல் பன்கூட்டு நிதியங்களைப் புரிந்துகொள்வது மற்றும் நிதிப் பிரதிநிதியின் பதிவைச் சரிபார்ப்பது வரையிலான அனைத்துத் தலைப்புகளையும் இந்த உண்மைத் தரவு அட்டைகள் கொண்டிருக்கின்றன. அவை அனைத்தும் OSC -யின் நுகர்வோர் கல்வி வலைத்தளமாகிய GetSmarterAboutMoney.ca -யில் அடையாளம் காணப்பட்டுள்ளன.

உண்மைத் தரவு அட்டைகளை ஒரு பகிரங்கமாகக் கிடைக்கும் வலைக் குறியீட்டைப் பயன்படுத்திப் பதியச்செய்து (YouTube வீடியோக்களை வலைத்தளங்களில் பதியச்செய்வதைப் போல), அவற்றை சமூக ஊடக இணைப்புகள் வாயிலாகப் பகிர முடியும்.

4 signs of investment fraud

Seniors: 6 signs of financial abuse

OSC Investor Warnings and Alerts

GetSmarterAboutMoney.ca

GetSmarterAboutMoney.ca ஆனது ஒன்ராறியோ நிதியங்கள் ஆணையத்தின் (Ontario Securities Commission) ஒரு இணையத்தளமாகும், இது உங்கள் பணத்தைப் பற்றிய சிறந்த முடிவுகள் எடுக்க உங்களுக்கு உதவக்கூடிய சுதந்திரமான மற்றும் பாரபட்சமற்ற தகவல்களை வழங்குகிறது.

முதலீட்டின் அடிப்படைகள், கனடாவில் கிடைக்கும் பல்வேறு வகையான முதலீட்டுக் கணக்குகள் மற்றும் ஒரு முதலீட்டைத் தேர்ந்தெடுப்பதற்கு முன்பு கேட்க வேண்டிய கேள்விகள் பற்றிய தகவல்களை நீங்கள் இங்கே காணலாம்.

மேலும், நீங்களும் உங்கள் குடும்பத்தினரும் சிறந்த தகவலறிந்த முடிவுகளை எடுக்க உதவுவதற்கு GetSmarterAboutMoney.ca ஆனது கணிப்பான்கள், பணித்தாள்கள் மற்றும் வினாடிவினாக்களையும் கொண்டிருக்கிறது.

மேலும் அறிந்துகொள்க